စားသောက်မှုက အိပ်စက်မှုအပေါ် ဘယ်လိုသက်ရောက်နိုင်သလဲ
လူသားတိုင်းအတွက် ကျန်းမာရေးကောင်းစေဖို့နဲ့ နေ့စဉ်ကောင်းကောင်းမွန်မွန် လုပ်ကိုင်လှုပ်ရှားနိုင်စေဖို့ အာဟာရဓာတ်စုံလင်အောင် စားဖို့အရေးကြီးပါတယ်။ အာဟာရဓာတ် ပြည့်ဝအောင် စားသုံးပါမှ -
- ကိုယ်တွင်းအင်္ဂါတွေ ကောင်းကောင်းအလုပ်လုပ်ပြီး ကျန်းမာမယ်
- ခန္ဓာကိုယ်တွင်းက ဟော်မုန်းထုတ်လုပ်နိုင်စွမ်း မြင့်တက်လာမယ်
- ကြွက်သားနဲ့ အရိုးအဆစ်တွေကို ကြံ့ခိုင်စေတယ်
- ပျက်စီးသွားတဲ့ တစ်ရှူးနဲ့ ဆဲလ်အဟောင်းတွေကို အမြန်ဆုံးပြန်လည်ပြုပြင်ပေးနိုင်မယ်
- ဦးနှောက်နဲ့ အာရုံကြောစနစ်တစ်ခုလုံးကို ပံ့ပိုးပေးနိုင်မယ်
- စိတ်ဖိစီးမှုကို သက်သာစေပါတယ်။
ဒါတင်မကသေးပါဘူး။ အာဟာရဓာတ်စုံလင်အောင် စားပေးမယ်ဆိုရင် ကိုယ့်အိပ်စက်မှုပုံစံကိုပါ မြှင့်တင်ပေးနိုင်မှာဖြစ်လို့ ညဘက်ကောင်းကောင်း အိပ်မရသူတွေအတွက် သတင်းကောင်းဖြစ်မှာပါ။
ဒါဆို အာဟာရဓာတ်နဲ့ အိပ်စက်မှုပုံစံကြား ဘယ်လိုဆက်စပ်နေလဲ?
- အာဟာရဓာတ်ဟာ ကျန်းမာရေးအတွက် အဓိကကူညီပံ့ပိုးပေးတဲ့အရာထဲ ပါဝင်တဲ့အတွက် ခန္ဓာကိုယ်က ပုံမှန်အတိုင်းလည်ပတ်နေသမျှ၊ ကျန်းမာရေးကောင်းနေသမျှ ညဘက်မှာ ကောင်းကောင်းအိပ်စက်နိုင်ဖို့ ကူညီပေးနိုင်မှာပါ။
- အာဟာရဓာတ်ပြည့်ဝတဲ့အခါ ခန္ဓာကိုယ်ကနေ အကျိုးပြုဟော်မုန်းတွေ၊ ပျော်ရွှင်မှုဟော်မုန်းတွေ အများအပြားထွက်တာကြောင့် စိတ်ဖိစီးမှုကို လျော့ကျစေပါတယ်။ စိတ်ဖိစီးမှုများတဲ့အခါ ကြွက်သားတွေက ပိုတင်းမာပြီး အိပ်ပျော်ရခက်ခဲတာကြောင့် ဒီပြဿနာကို အာဟာရဓာတ်ကနေ ထိန်းချုပ်ပေးပါတယ်။
- အာဟာရဓာတ် စုံလင်အောင်စားပေးတဲ့အခါ ခန္ဓာကိုယ်က Balance ညီပြီး ပုံမှန်အတိုင်းအလုပ်လုပ်နိုင်သလို Metabolism ချေဖျက်နှုန်းကလည်း မြန်ဆန်ပါတယ်။ Metabolism ဟာ ခန္ဓာကိုယ်အလုပ်လုပ်နိုင်မှု၊ ကယ်လိုရီလောင်ကျွမ်းမှု၊ အာဟာရဓာတ်ဖြိုခွဲအသုံးချမှုအပြင် အိပ်စက်မှုကိုလည်း ပံ့ပိုးပေးပါတယ်။
- အပြန်အလှန်အနေနဲ့ အိပ်ရေးဝတဲ့အခါ ဦးနှောက်ကနေ ကောင်းကောင်းအနားရသလို အာရုံကြောစနစ်က အားပြည့်သွားတဲ့အတွက် အစာစားချင်စိတ်ကို ဖြစ်စေပါတယ်။ စိတ်နဲ့ခန္ဓာကျန်းမာရေး ပိုကောင်းလာတာနဲ့အမျှ လူ့ဦးနှောက်ကနေ ကျန်းမာရေးကို အရင်ကထက် ပိုဂရုစိုက်ဖို့နဲ့ အာဟာရဓာတ်စုံလင်အောင် စားပေးဖို့ ပိုတောင်းဆိုလာတတ်ပါတယ်။
ဘယ်လိုအာဟာရဓာတ်တွေက အိပ်စက်မှုပုံစံကို အထောက်အကူပြုလဲ? ဘာတွေကို ရှောင်ကြဉ်သင့်လဲ?
အိပ်စက်မှုအကျိုးပြု အာဟာရဓာတ်တွေအနေနဲ့ -
- Vitamin A
- Vitamin C
- Vitamin D
- Vitamin E
- Vitamin K
- Omega-3 Fatty Acid
- Folic Acid (ဖောလစ်အက်စစ်)
- ကယ်လ်စီယမ်ဓာတ်
- မဂ္ဂနီဆီယမ်ဓာတ် စတာတွေကို ပိုစားပေးသင့်ပါတယ်။
အကယ်လို့ ကိုယ်က အိပ်ရေးမကြာခဏပျက်နေတတ်တယ်၊ ဒါမှမဟုတ် ညဘက်မှာ အိပ်ပျော်ဖို့ခက်ခဲသူတွေဆိုရင် -
- အဆီများတဲ့ အစားအစာတွေ
- အပူအစပ်တွေ
- ကဖင်းဓာတ်တွေ
- အရက်တွေကို ရှောင်ကြဉ်၊ လျှော့ချသင့်ပါတယ်။
အာဟာရဓာတ်ကို စုံလင်အောင် စားသုံးပေးပြီး ကျန်းမာရေးကို ဂရုစိုက်ပေးခြင်းဟာ ညဘက်မှာ ကောင်းစွာအိပ်ပျော်နိုင်ဖို့ များစွာအထောက်အပံ့ပေးနိုင်ပါတယ်။ အကယ်လို့ မိတ်ဆွေတို့အနေနဲ့ ညဘက်အိပ်မပျော်တဲ့ပြဿနာ၊ Insomnia လို အိပ်စက်မှုဆိုင်ရာ ကျန်းမာရေးပြဿနာတွေ ခံစားနေရတယ်ဆိုရင် နားလည်တတ်ကျွမ်းတဲ့ ဆရာဝန်နဲ့ တိုင်ပင်ပြသကြည့်သင့်ပါတယ်။
ရဲမျိုးမြတ်